Елімізде ерлігімен көзге түсіп, халықтың ыстық ықыласына бөленген азаматтар аз емес. Жақында ғана бұл тізімге қызылордалық тағы бір жас қосылды деп хабарлады turkystan.kz.
Өткен аптада қала орталығындағы «Универсам» шағын ауданында оқыс оқиға болып, екі жарым жастағы сәби ашық тұрған кәріз құдығына түсіп кеткен. Аралдан арман қуып, оқуға келген 15 жастағы Арман Аманжолов көзсіз ерлікке барып, баланы құдықтан алып шықты.
Бозбаланың батырлығына тек жерлестері ғана емес, тұтас ел болып қуанып, ерлігіне тәнті болды. Бүгін облыс әкімі Нұрлыбек Нәлібаев педагогтердің Тамыз кеңесінде мұқалмас ерік — жігерімен, табанды тәуекелге барған аралдық Арманға демеушілер көмегімен пәтер кілтін табыс етті.
- Мемлекет басшысы тарапынан азаматтарымыздың мұндай ерекше батыл қимылдарын елеусіз қалдырмай, өзгелерге үлгі ету туралы ұстанымы аясында бүгін Арман батырға, оның ата -анасына барша Сыр елінің атынан зор ризашылығымызды білдіремін. Бүгінде аймағымызда жомарт жүректі жанашыр азаматтар жетерлік. Сол демеушілердің атынан бүгінгі бейбіт күннің батыры болған бозбалаға баспана кілтін табыс етеміз. Қарапайым ғана ауыл баласының бұл ерлігі өзі сияқты қатар жүрген балаларға үлгі болсын, елдің ішінде осындай азаматтар көп болсын», – деді Н.Нәлібаев.
Арман Аманжолов Арал ауданы, Бөген ауылында 2007 жылы дүниеге келген. 5 ағайынды, 2 тәтесі, 2 ағасы бар. Әкесі Жаңалық жұмыссыз, анасы Майра мектеп асханасында жұмыс істейді.
Айта кетейік, өңірде «Балалар жылы» қалада 1 млрд теңгеге 50 — ге тарта спорт алаңдары, аудандарда 600 млн теңгеге 30 — дан астам спорт — ойын алаңдары салынады. Бұл жұмыстар демеушілер есебінен іске асырылып жатыр.
Арманнның батылдығы мен батырлығын бағалаған Қызылорда облыстық полиция департаментінің бастығы, полиция полковнигі Әбдібек Жаназаров арнайы құттықтап, қол сағаты мен алғыс хатты тапсырған болатын.
Сурет: облыстық полиция департаменті баспасөз қызметі
«FSH»