8 жасар өнертапқыш

Астаналық сегіз жасар Айша мен өскемендік Ева есту қабілеті бұзылған балаларды оңалтуға арналған қосымшаның прототипін әзірледі. Олар өз жобаларын Калифорниядағы «Technovation Girls» Халықаралық қыздар технологиялық байқауының финалында ұсынбақ. Қыздарымыз бастауыш сынып оқушыларына арналған «Beginners» дивизионындағы байқауға қатысады.

Айша Есет пен Ева Журки­наның «digidaisies» командасы кохлеарлық имплантация отасын өткен ішінара есту қабілеті нашар балаларға арналған қолданбаның прототипін жасады. Қолданба сөйлеуді, сөйлеу дағдыларын дамытуға көмектеседі. Жаттығу үшін қолданба бір­неше құралды ұсынады. Мысалы, сөйлеу гимнастикасы, дыбыстық тре­нажер, әртүрлі тест. Қол­дан­бадағы телефон камерасы арқылы нысандарды тану үшін қыздар нейрондық желіні пай­даланған. Таңғалар­лығы, қо­сымшаны қыздар досына көмектескісі келіп жасаған. «Біз бұл жобаны шын жүректен таң­да­дық, өйткені біздің досымыз Айлин бар. Өкінішке қарай, ол туғаннан естімейді және имплантация отасын жасатты. Біздің оған көмектескіміз келеді», дейді Айша.

«Technovation girls» бағдар­ламасы ақпараттық технология­ларды меңгеруге және жобаларды басқару, IT-кәсіпкерлік дағдыларын алуға қызығушылық танытатын 8-18 жастағы қыздарға арналған. Оның негізгі міндеті – қыздардың IT-әлемге деген қызығушылықтарын ояту әрі технология әлемді жақсы жаққа өзгертудің тиімді құралы бола алатынын көрсету.

– Егер сіз IT-да дамығыңыз кел­­­се, сол қызығушылық таныт­­­­қан­дар­дың ортасын табу өте маңызды, өйт­кені сізбен ортақ мүдделері бар адамдармен байланыс жасау – нә­тиже­­­нің алғашқы баспалдағы, – дейді бағ­­дар­ламаның тәлім­гері және Яндекс так­си­дегі аға тестілеу инженері Мила Баду.

Биыл еліміз бұл техно­ло­гия­­лық байқауда бүкіл әлем бо­йын­ша берілген өтінімдер санынан үздік үштіктің қатарына енді. Нақтырақ айтар болсақ, ­2 345 қыз байқауға өтініш берген. Бұл – еліміз үшін рекордтық сан.

8 жыл ішінде Қазақстаннан барған ко­­ман­далар финалға 6 рет шықты. Ал 2017 жылы отандас­тарымыз 63 бас­қа елдің ішінен Гран-при жеңіп ал­ды. Осы жылы да кішкентай бал­дыр­ған­дарымызға сәттілік тілейміз!

«Egemen Qazaqstan»