Қағазға түскен сезімдер

17 наурыз — мәдениет және салт-дәстүр күні. Осы күні Сағи Жиенбаев атындағы облыстық жасөспірімдер кітапханасы жастардың бойында ұлттық құндылықтарды насихаттау, мәдениетті қалыптастыру мақсатында «Автормен бірге кітап оқу» іс-шарасы ұйымдастырылып, кітап оқу мәдениетін, ақындық өнерді насихаттауға арналған әдеби кездесу кешін өткізді. Кездесу қонақтары Ақтөбелік айтыскер ақындар: ҚР Мәдениет саласының үздігі, ақын  – Жұлдыз Қожабекова және талай хит әндердің авторы, әншілердің бағын ашып жүрген ақын, ҚР Мәдениет саласының үздігі — Ершат Қайболдин. Сонымен қатар әдеби кешке «Екі езу» сатира театрының көркемдік жетекшісі, ҚР Мәдениет қайраткері  Нұрлыбек Жұбатқан және «Ер Едіге» жыр мектебінің жетекшісі, Мәдениет саласының үздігі Әділбек Сарин, «Аманат» партиясының Ақтөбе облыстық филиалының  өкілдері және кітапханамыздың белсенді жастары қатысты. Кеш қонақтары шығармашылықтарындағы жаңалықтарын, өзгерістер туралы айтып өтті. Жалпы өлең жазуды қай кезден бастағандығы, алғашқы жазған өлеңдері мен сахнада кездескен қызықты оқиғаларымен бөлісті.

Айтыс – ауыз әдебиетінде ежелден қалыптасқан поэзиялық

жанр, топ алдында қолма-қол суырып салып айтылатын сөз сайысы, жыр жарысы. Кеш қонақтары Жұлдыз ханым мен Ершат мырзаның да осы сөз сайысында жүргендеріне біраз жылдар болды. Айтыскерлік пен жазба поэзияның жанына жақын тұстарын айтып, жалпы айтыста импровизация қалай туатынын және шабытты қайдан алатындарымен бөлісті. Ершат айтыста жастардың қатары көбейіп, жас буынның осы сөз сайысына қызығушылық танытып келе жатқанын ерекше айта кетті. Ақындар айтыс алдында ерекше дайындық жасайтынын және үлкен жауапкершілік талап етіледі дейді. Кездесу кеші барысында Ақтөбе айтыс одағының мүшесі Злиқа Бауыржанқызы қонақтарға арнау  арнады.

Ақын Жұлдыз Қазиханқызының 2021 жылы алғашқы кітабы жарық көрген болса,  2024 жылы «Ақын мен ақыл» жыр жинақ кітабын оқырман қауымға ұсынды. Үлкен деңгейде шығармашылық кеш ұйымдастырды.  Кітаптарының өмірге келуі мен шығармашылық кеші туралы кеңнен тарқата бөлісті. Ал, Ершат Қайболдин әзірге тек қана шығармашылықпен айналысып, өлең жазуды қолға алып жүргенін айтты. «Айсын радиожурналистика» мектебінің оқушылары мен Қ.Жұбанов атындағы униветситет студенті Рахметтола Әділхан ақындардың шығармашылығынан өлеңдер оқыды.

    Жұлдыз Қазиханқызы облыс әкім жанындағы әйелдер істері және отбасылық-демографиялық саясат жөніндегі коммисия мүшесі ретінде атқарылып жатқан жұмыстары жайында және қоғамдағы қандай мәселелер алаңдататыны жөнінде айтты.  Жеке өмір мен шығармашылық арасындағы балансты сақтап жүрген ақындар көрермендерге өз шығармашылығынан өлеңдерін оқып берді.

Шара аяғында  Жұлдыз Қазиханқызының сөзіне жазылған  «Махаббат бағы» әнін автормен бірге Нұрлыбек Жұбатқан шырқады. Сүбелі сұхбат, әдемі әдеби кеш осылайша өрбіді.

Лаура ЕРІКҚЫЗЫ,

Сағи Жиенбаев атындағы

Ақтөбе облыстық жасөспірімдер

кітапханасының кітапханашысы.

Ақтөбе қаласы.