Ата-ана мен ұстаз сыйластығы тоғысқанда

Ұстаз болу – абыройлы қасиет. Мен бастауыш сынып мұғалімі болғанымды мақтан тұтамын. Ақкөңіл, жүрегі кіршіксіз ұл-қыздардың пәк ниетін көргенде, ешбір ұстаз мектептен кеткісі келмейтіні анық. Қоғамда ұстаз жайлы әртүрлі пікірлер айтылуда. Алайда, ондай пікірлер өмірін бала оқытуға арнаған ұстазға кері әсерін тигізбейді. Елімізде «Мұғалім мәртебесі» туралы Заң аясында мемлекет тарапынан мұғалімге, соның ішінде жас ұстаздардың әлеуметтік жағдайын жақсарту мәселелері қалалық және ауылдық жерлерде  жасалуда. Педагогикалық платформаларда жас ұстаздарға арналған біліктілігін дамыту байқаулары ұйымдастырылуда. «Жас ұстаз», «Жаңа мектепке – жаңашыл ұстаз», басқа да байқаулар арқылы ұстаздық қабілетін, жаңа технологияларды пайдаланып, өткізген тәжірибе сабақтарының жаңашылдығымен бөлісіп, тәжірибе алмаса алады. Мұндай байқауларға бастауыш сынып мұғалімдері де қатысып келеді.

Бала оқыту – адам бойындағы ізгі қасиет. Бүгінде бала оқытудың  машақаттары көп деп ұғады. Қай мамандық иесі болсын қиындықсыз болмайды. Әр қиындықты білімділікпен, парасаттылықпен реттеудің жолын тауып, шешім қабылдау – өз мамандығын шынайы сүйген адамның ғана қолынан келеді. Ұстаз мамандығын таңдағанда, қателеспегенімді білдім. Бастауыш сыныпты оқытып келемін. Екі айға жуық уақыттан соң 2 – сыныпты бітіріп, келесі оқу жылы  3- сыныпқа қадам басамыз.

Бастауыш сыныпта оқушының қалыптасуына ата-ана мен ұстаз бірге жұмыла жұмыс істеуі керек. Бұл тұрғыдан алғанда сыныбымның ата-аналары өте ұйымшыл. Жас ата-ана болғандықтан, мектепте бастауыш сыныпта білім берудің  жаңа бағдарламаларын игере алатын дәрежеде. Ата — ана мен мектеп арасындағы сыйластық, бірін – бірі түсінуі баланың білімі мен тәрбиесінде сапалы білім алуға апарар жол дер едім. «Ана тілін» оқи отыра ана тіліміздің құдіретін түсінеді. Ана тілімізді оқып, тұлғалардың шығармаларын оқып, жаттайды. Ұлттық құндылықтарымызға  біртіндеп қаныға салт – дәстүрді үйренеді. Отан,  мектеп пен ұстаз туралы түсініктері толыға түседі. Ата – ана мен отбасы, дос, бауырмалдылық қасиеттерін тәрбие сағаттарында жандүниесіне сіңіре бастайды.

Оқушылардың оқу сауаттылығын арттыру үшін олармен оқулықтағы тақырыптарды дамыта отырып, әңгімелесуге көбірек уақыт бөлемін. Бүгінгінің баласы жан-жақты, танымдық қабілеті жоғары. Алайда, оны жетілдіру үшін қысқа шығарма жазумен қатар сөздік қорын көбейтуіміз қажет. Жаңа технологиялар әр салада дамып келеді. Балалар қазір теледидардан гөрі қолындағы сматфонды көп пайдаланады. Смартфонның пайдасы да, зияны да бар. Зияны балалар өзара әңгімелесуден қалып барады. Екінші сынып оқушылары болса да, байқағанымдай смартфонда сөзбен сәлемдесудің орнына да, бірін-бірі қуанышымен құттықтаса да, бір-біріне ренжіп қалса да дайын суреттермен ұқтырады. Өкінішке орай, бұл әдет үлкендерге де әбден сіңіп кетті деуге болады. Бастауыш сыныптан баланы қатесіз сөйлеуге дағдыландыруға міндеттіміз.

Екінші сынып оқушыларымен ұстаздар, аналар мерекесіне орай сынып сағаттарын өткіземіз. Наурыз мерекесін атап өтеміз. Әр шарада ұлдар мен қыздар, өзім де ұлттық киім киеміз. Ұлттық  киім – тарихымыздың көзі, қазақ мәдениетінің маңызды атрибуты. Сол себепті, оқушыларымыз мектепте ұлттық киімнің кеудешесін киіп, оған мақтанышпен қарайды. Оқушыларыма ұлттық киіміміздің ерекшелігі, ондағы ою-өрнек туралы қысқаша айтып беремін. «Қайталау – оқу анасы» — дейді ғой, сондықтан оқушыларымның ұлттық киім арқылы тігін тігу, мата, киім тігетін шеберлер туралы мағлұмат алғаны артық болмайды. Ою-өрнегіміз халқымыздың ішкі мәдениетін көрсететін элементтердің жиынтығы.

Оқушылармен әңгіме өткізгенде, міндетті түрде жол қауіпсіздігі, өрт кезіндегі қауіпсіздіктерді де айтып өтемін. Бала жастан олар да қауіпсіздік ережелерін жіті білуі қажет. Ата – анамен де сөйлесіп, балалармен бірге жұмыс істегенде үй тапсырмасымен ғана шектеліп қалмай, сабақта өткен тақырыптары, тәрбие сағатындағы тапсырмаларды бірге орындауын өтінемін. Ата – анамен бірлесіп жұмыс істеуіміздің нәтижесінде оқушыларымның сабақ үлгерімі қуантады. Бастауыш сыныптарға арналған байқауларға қатысып, жақсы нәтиже көрсетуде. Байқауларда топ жарып, дипломдарға ие болды. Екінші сынып үшін бұл айтарлықтай жетістік.

                                                                    КАСЫМОВА  Надира Мұратқызы,

Алматы қаласы, «№15 гимназия» бастауыш

2 «В» сыныбының мұғалімі.