Ішкі сұлулықтың ғажайыбы

Өмірдің қиындықтарымен күресудің ғажайып тәсілі Р.Ж.Палассионың «Ғажайып» кітабында басты кейіпкердің таза жүрек, пәк көңілімен ерекшеленеді.

Бірден айта кетелік, терең философиялық және әлеуметтік мәні бар бұл кітапты әрбір жас оқырман оқуы тиіс.

Орта мектеп, жасөспірімдік шақ — ең қиын әрі қызық кезең. Осы уақытта айналасынан қысым көрген оқушы өзін қалай қабылдайды?

Бұл кітаптың басты кейіпкері- Огги есімді ерекше келбетті бала. Сонымен қатар, құлағында аздап ақауы да бар. Ондай кемшілік кездессе де, оның жүрегіне берілген махаббат пен мейірімнің өлшемі шексіз. Яғни, кітап жүректегі сұлулықты байқауға шақырады десек дұрыс.

Бетінің кемістігіне байланысты кейіпкеріміз Огги өмірінің көп бөлігін үйде өткізеді. Ол алғаш орта мектепке барғанда, жаңа ортада өзін қалай қабылдату керек екенін білу үшін күреседі.  Ол кейбір ақымақ балалардың кемсітуі мен мазағына қалса да, өзін қабылдап өзгелерді де қабылдауды үйренеді. Оггидің кемістігін емес, оның шынайы болмысын көріп, дос болуға шешім қабылдаған алғашқы достары Джек пен Шарлотта есімді балалар. Оггидің Виа есімді әпкесі болады. Ол үшін де інісінің кемшілігі қиындық тудырды. Кейде тіпті ұялатын. Оған қарамастан ол бауырына қамқор әрі ашық бола білді.

Жалпы бас кейіпкердің өмірі — қоғамдағы қабылдау мен кемсітушіліктің, достық пен өзара көмек көрсетудің маңыздылығын көрсететін терең әңгіме. Огги нағыз-батыр. Оның әңгімесі оқырманның мейірімін ұлғайтады. Кітапта тек Оггидің ғана әңгімелері емес. Оның жақындары әрі айналасындағы әрбір кейіпкердің өз ойын көрсетеді. Әрине, әлемде жаман адам жоқ. Әрбірінің өз шыңдығы бар. Тек түсініспеушіліктер ғана орын алады. Әр кейіпкердің өз ойын оқи отырып, олардың ішкі әлемін ұға аламыз.

Огги бізге адамды сыртқы көрінісіне қарап емес, оның ішкі әлеміне қарай бағалауымыз керек екенін және әлемді тек жақсы өзгерістерге бағыттай алатынымызға еш күмән келтірмей үйретеді.

Сұлулық-таза жүректе. Ал жүректің сұлулығын мейріміділік көркейтеді.

“Мейірім мен әділеттің біреуін таңдау керек болса, мейірімді таңдаңыз, Құрметті оқырман!

ТҰРДАҚЫН Әмина Жанатқызы,

Абай атындағы Республикалық мамандандырылған

дарынды балаларға арналған қазақ тілі мен әдебиетін тереңдете оқытатын

орта мектеп-интернатының 10-сынып оқушысы.