Кино тек көңіл көтеру ме, әлде рухани тәрбие құралы ма?

Әр кинода шындық пен тәрбие, өнеге мен  өмірден  алынған кейіпкер бар.

Соңғы жылдары қазақстандық кино саласы жаңа серпін алып, көрермен талғамына сай түрлі жанрдағы фильмдер көбейіп келеді. Әсіресе, ұлттық құндылықтарды, адам жанының нәзік иірімдерін суреттейтін туындылар прокатта сұранысқа ие болуда. Қазір кинотеатрларда көрсетіліп жатқан «Ғашықпын саған» және «Құшақташы, мама» фильмдері – соның айқын дәлелі.

Махаббат пен арман тоғысқан туынды

Жаңа мелодрама жанрындағы «Ғашықпын саған» фильмі көрерменге сезім мен өмірлік таңдау жайлы әсерлі оқиға ұсынады. Фильмнің басты кейіпкері – Еңлік есімді студент қыз. Ол үлкен қалаға оқуға келіп, болашаққа сеніммен қадам басады. Алайда өмір жолында кездескен қиындықтар, отбасы алдындағы жауапкершілік пен жеке армандар арасындағы таңдау кейіпкер тағдырын күрделендіре түседі.

Кино туындысы жастардың өмірлік мақсаттары, махаббаттың шынайы мәні және үлкен қаладағы арман қуған жандардың тағдырын бейнелейді. Фильмнің көркемдік шешімдері, музыкалық сүйемелдеуі мен заманауи түсірілім стилі көрермен назарын ерекше аударып отыр. Сарапшылар бұл туындыны романтикалық әрі эмоциялық тереңдігімен ерекшеленетін заманауи қазақ киносының жаңа деңгейін көрсететін жоба ретінде бағалауда.

Ана махаббаты – мәңгілік тақырып

Ал «Құшақташы, мама» фильмі – отбасылық құндылықтарды арқау еткен әсерлі драма. Туынды Жалғас пен оның анасы Майраш арасындағы қарым-қатынасты баяндайды. Өмір сынақтары, өкпе мен кешірім, мейірім мен сағыныш секілді сезімдер фильмнің негізгі желісіне айналған.

Кино көрерменді ана мен бала арасындағы байланыстың қаншалықты маңызды екенін терең ойлануға жетелейді. Актерлік құрамның шынайы ойыны мен сюжеттік желінің өмірге жақындығы фильмнің әсерін күшейте түскен. Туынды прокатқа шыққан алғашқы апталардан-ақ көрермен ықыласына бөленіп, жақсы кассалық көрсеткішке қол жеткізді.

Ұлттық киноның жаңа тынысы

Бұл екі фильм де қазақстандық  кино өндірісінің көркемдік деңгейінің өсіп келе жатқанын көрсетеді. Бүгінде отандық режиссерлер мен продюсерлер көрерменнің талғамын ескеріп, ұлттық болмыс пен заманауи тақырыптарды үйлестіре отырып сапалы жобалар ұсынуда. Мұндай фильмдердің прокатта табысқа жетуі – қазақ киносына деген қызығушылықтың артқанын аңғартады.

Қазіргі таңда кинотеатрларға жол тартқан көрермен тек көңіл көтеруді ғана емес, өмірлік құндылықтар туралы ойлануды да қалайды. «Ғашықпын саған» – махаббат пен арманның бағасын ұқтырса, «Құшақташы, мама» – отбасы жылуының қадірін сезіндіреді. Осы арқылы екі туынды да көрермен жүрегінен орын тауып, ұлттық кинематографияның жаңа кезеңге қадам басқанын дәлелдеп отыр.

ТАҢАТАР  Нұрайна,

Атырау облысы, Құрманғазы ауданы,

«Абай атындағы жалпы орта мектебінің» 10-сынып оқушысы.

Жетекшісі: Айдана Әділханқызы,

Қазақ тілі мен әдебеиеті пәндерінің мұғалімі.

Сурет: https://vestnik19.kz/news/obshestvo/qushaqtashy-mama-