Маңызды таңдау

Адам өмірінде өте маңызды екі таңдау бар. Оның бірі-өмірлік жар, ал екіншісі-мамандық. Бұл екі таңдау ең маңызды, себебі кейінгі тағдырыңа әрі болашағыңа тікелей әсер етеді. Мен үшін қазір ең өзекті тақырыптардың бірі-болашақ мамандықты таңдау.

Мен қазір он бірінші сынып оқушысымын, мектеп бітіруіме не бәрі екі ай көлеміндегі уақыт қалды. Шыны керек он алты жасар жасөспірімге болашағына тікелей әсер ететін мамандық таңдау, әрі болашаққа деген үлкен қадам екенін түсіну өте қиын. Бірақ мен өзімнің болашақ мамандығымды өз қалауыммен таңдадым деп жүз пайыз сенімділікпен айта аламын.

Менің болашақ мамандығым- журналист. Осы мамандықты нақты таңдамай тұрып  жиі ауыстырдым,ағылшын тілі пәні мұғалімі, менеджер, режиссер және т.б мамандықтарды таңдап көрдім, бірақ ақырында өзімді осы салалардың иесі ретінде елестете алмадым.

Мен неге журналист болуды таңдадым? Біріншіден, мен өзімнің қолымнан келетін мамандық иесі болғым келді және өзімнен жақсы, қарапайым халық пен биліктің арасындағы алтын көпір болатын журналист шығатынына сенімділік таныттым. Екіншіден, мен бала кезімнен  өзіме  қызық, танымал тұлғалардың сұхбатын көріп, өз ойымнан жаңа сұрақтар ойлап тауып, өзімді жүргізушінің орнында елестеткенді жақсы көретінмін. Үшіншіден, менің бала күнгі арманым -елге танымал, өнердің бір бөлшегі болу, ал журналист болу маған көптеген мүмкіндіктер беріп, болашағыма жарқын жол ашады деген үмітім бар. Осы себептерге байланысты өзімнің нақты мамандығым ретінде журналист болуды таңдадым.

Мамандық таңдаған соң, сол мамандықтың маманы етіп шығаратын жақсы оқу орнын таңдау керек. Мен негізі мамандықтан бұрын жоғарғы оқу орнын таңдап қойғанмын, себебі менің қатты армандаған университетім бар еді. Ол- SDU университет.

SDU – оқу үдерісін халықаралық үлгідегі бағдарламаға сай жүргізетін оқу орны. SDU University материалдық-техникалық базаны нығайтуға, халықаралық серіктестермен байланыс орнатуға және білікті кадрлар даярлауға қабілетті ауқымды білім беру және ғылыми мекемелердің бірі.  Сонымен қатар SDU  университетінің білім беру жүйесі өте жоғары,  сондықтан білікті маман иесі болып шығуға болады. Менің пікірімше, сапалы түрде білім алып, кейін өз мамандығыңның жемісін көру үшін, барлық емтихандарды өз күшіңмен тапсыру керек, ал SDU -нағыз адал білім алушылар мекені.

Мамандық және университет таңдау – болашаққа деген айқын қадам. Егер қазір ешкім мамандық таңдаудан жаңылмаса, болашағы жарқын, бақытты жандар көп болушы еді. Сол үшін барлық адамға өмірдің маңызды екі таңдауынан сүрінбей өтуді тілеймін.

  ТУРКЕБАЙ Ақзере Маратқызы,

Абай атындағы РММИ 11 – сынып оқушысы,

Алматы қаласы.

Сурет:https://qazdauiri.kz