Кітапханада өткізілген акция

ТОҚАЕВ Қасым-Жомарт, Қазақстан Республикасының Президенті:

«Біз, ең алдымен, жастарды кітап оқуға баулуымыз керек. Сонда жаппай кітап оқитын ұлтқа айналамыз. Тәуелсіздік кезеңінде елімізде кітапхана ісі кенжелеп қалды. Тоқсаныншы жылдардағы аласапыран уақытта мыңдаған кітапхана жабылды. Миллиондаған кітап қорынан айырылдық. Соңғы жылдары жағдайды түзеу үшін әрекет жасалып жатыр. Кітапхана – мемлекеттің, ұлттың негізгі жады. Еліміз үшін құнды тарихи деректер мен материалдардың дені кітапханада сақталады. Сондықтан кітапхана ісін дамытуға бей-жай қарауға болмайды».

(Мемлекет басшысы Қасым-Жомарт Тоқаевтың

Ұлттық құрылтайдың «Адал адам – Адал еңбек – Адал табыс»

атты үшінші отырысында сөйлеген сөзі).

Мемлекет басшысының бастамасымен «Оқуға құштар мектеп», «Оқитын ұлт» жобасы құрылып, қазақ әдебиетіне көп көңіл бөлінуде. Жоба негізінде еліміздің мектептері кітапханаларында оқушыларға арналған тағлымды шаралар ұйымдастырылуда.  Кітап оқу мен кітапханаларды қолдау қоғам дамуының басты міндеттерінің бірі екенін айрықша атап айтқаны баршамызға  белгілі. Кітап барлық ілімнің қойнауы. Кітап оқу — адамға өзіндік әсер етіп, оның адам болып қалыптасуында маңызды рөл атқарады. Ал кітапты сыйлау -аса да құнды дүниенің бірі.

Мектеп оқушыларына кітап оқудың маңызын айта келе, ғұламаларымыздың өмірінен өнегесін айтамыз. Ең қиын заманда оқудан бас алмаған тарихи тұлғаларымыз да өзіне дейінгі көне заман кемеңгерлерінің жазып қалдырған дүниелерінен ғибрат алып, өзінің философиялық ойларын ақ қағаз бетіне түсірген. Бүгін жаңа технологиялар дамып келе жатқан жаңа ғасырда кітап оқу еш қиындық туғызбайды. Кітапхана сөрелері жаңа әдебиетпен жыл сайын толығуда. Тақырып аясы да кеңейе түскен. Шетел әдебиетінің қазақ тіліндегі аудармаларын да оқуға мүмкіндік бар. Оқулықтар мен көркем әдебиеттің электрондық нұсқалары қаншама? Тек оқуға ниет болса, болғаны.

Десе де, оқушылардың кітап оқуға құштарлығын арттыру мақсатында кітапхананың көтерер жүгі де аз емес. «Ақтоғай» орта мектебінің кітапханасы  «Оқуға құштар мектеп» жобасы негізінде «Балалар кітапханасы» бағдарламасын іске асыру маақсатында  «Шын жүректен кітап сыйла!» атты тақырыпта акция өткізді. Мақсаты:  оқырмандарды  жақсы кітап оқуға ынталандыру, бір-біріне кітап сыйлауға шабыттандыру және қағаз кітап әрқашан құнды сыйлық болып қала беретінін ұғындыру, өзара сыйластықты қалыптастыру. Акцияға оқушы ғана емес, ауыл адамдарының да бей-жай қарамай атсалысып келе жатқаны балаларға кітап сүйер ортаның толығып келе жатқанын білдіреді.

Мектептің  кітапханасында өтетін шараларға ауыл адамдары, ата-аналар да келіп қатысып, білгендерімен бөлісіп отырады. Акцияға оқушылар ғана емес, мектеп ұжымы да атсалып келе жатқаны балаларға үлгі. Кітапханада акция ұйымдастыру шаралары жыл бойы жалғаса береді.

Мейіргүл ОШАҚБАЕВА,

 Жамбыл облысы, Сарысу ауданы,

«Ақтоғай» орта мектебінің кітапханашысы