Әр адамның өмірінде ерекше маңызды шешімдердің бірі — мамандық таңдау. Себебі мамандық — тек табыс көзі емес, адамның болашағы мен өмір жолын айқындайтын үлкен қадам. Бала кезден әркім әртүрлі арман етеді: бірі дәрігер болғысы келеді, бірі ұстаз, енді бірі әнші не ғалым болуды қалайды. Алайда уақыт өте келе арман мен шындықтың арасы алшақтап, көптеген жастар мамандық таңдауда қиындыққа тап болады.
Бүгінгі таңда жастардың көпшілігі мамандықты өз қызығушылығына емес, қоғамдағы сұранысқа немесе жоғары жалақыға қарап таңдайды. Бұл — ең үлкен қателіктің бірі. Себебі адам сүймеген ісінде табысқа жете алмайды. «Жаны қаламаған іске қол бармайды» деген сөз бекер айтылмаған. Егер адам мамандығын жүрек қалауымен таңдаса, ол жұмысты міндет емес, өмірінің бір бөлігі ретінде қабылдайды.
Мамандық таңдауда ата-ананың ықпалы да үлкен рөл атқарады. Кей жағдайда ата-ана өз орындалмаған армандарын баласы арқылы жүзеге асырғысы келеді. Мысалы, баланың суретші болғысы келсе де, оны заңгер немесе дәрігер болуға мәжбүрлейді. Мұндай жағдайда жасөспірімнің ішкі қалауы мен сыртқы талаптың арасында қайшылық пайда болады. Соның салдарынан адам өз кәсібінен ләззат алмай, өмір бойы сүймеген іспен айналысуы мүмкін.
Тағы бір қиындық — мамандықтар туралы толық ақпараттың болмауы. Кей жастар белгілі бір саланың тек сыртқы көрінісіне қызығады. Бірақ оның жауапкершілігі мен қиындығын ескере бермейді. Мысалы, дәрігер болуды ақ халатпен ғана байланыстыратындар көп. Алайда дәрігердің мойнында адам өмірі тұрғанын бәрі бірдей түсіне бермейді. Сондықтан мамандық таңдауда тек қиялға емес, шынайы мүмкіндіктер мен қабілетке сүйену қажет.
Қазіргі заман — бәсекенің заманы. Технология дамыған сайын жаңа мамандықтар пайда болып, кейбір кәсіптер сұраныстан шығып жатыр. Осы себепті жастар болашақты да ескеруі тиіс. Бірақ ең бастысы — адам өз қабілетін дұрыс танып, үздіксіз ізденуден қорықпауы керек. «Еңбек түбі — береке» деген мақал табысқа жетудің басты кілті еңбек екенін дәлелдейді.
Мамандық таңдау — бір күнде шешілетін мәселе емес. Ол — ойлануды, ізденуді және жауапкершілікті талап ететін маңызды шешім. Арман адамға қанат бітірсе, шындық оны шыңдайды. Сондықтан адам арманынан бас тартпай, соған жетудің жолын таба білуі керек. Өйткені сүйікті мамандық — бақытты өмірдің бастауы.
Қорытындылай келе, мамандық таңдау — адам тағдырын айқындайтын үлкен белес. Бұл жолда қателеспеу үшін әр жас өз жүрегінің үнін тыңдап, қабілеті мен мүмкіндігін дұрыс бағалауы қажет. Сонда ғана арман мен шындық бір арнада тоғысып, адам өз өмірінен шынайы бақыт табады.
Жанерке ҚАЛАС,
Қызылорда облысы, Қазалы ауданы, Шәкен ауылы
«№134-орта мектебінің» 11-сынып оқушысы.
Жетекшісі: Өтетілеуов Айдарбек,
Қазақ тілі және Әдебиеті пәндерінің мұғалімі
Дереккөздер:azattyq.org