«Farabi Shakirti» мектеп мұғалімдері мен орта және жоғары оқу орындары оқытушыларына, сала мамандарына, магистранттар мен жасөспірімдерге арналған Республикалық желілік басылым-сайты
Қоғам

Біз косметиканы өзіміз үшін қолданамыз ба, әлде өзгелердің бағасы үшін бе?

? Сурет: ЖИ көмегімен жасалынды (Жасанды интеллект).

Жолдаған: автор Абдиразакова Кәусар

Қазір косметика көп қыздың күнделікті өмірінің бір бөлігіне айналды. Бірі макияж жасағанды ұнатады, енді бірі бет күтіміне көбірек көңіл бөледі. Әдемі көріну, өзіне қарау жаман нәрсе емес. Бірақ кейде бір ой мазалайды: біз косметиканы шынымен өзіміз қалағандықтан қолданамыз ба, әлде өзгелерге әдемі көріну үшін бе?

Қазір әлеуметтік желіде мінсіз тері, әдемі макияж, қымбат косметика туралы видеолар өте көп. Оларды көргенде кейбір қыздар өз келбетіне көңілі толмай, өздерін өзгелермен салыстыра бастайды. Біреу бояусыз жүруге ұялады, енді бірі косметикасыз өзін әдемі сезіне алмайды. Кейде адамға өзінің табиғи келбеті ұнамай қалуының себебі де осы шығар. Өйткені біз күн сайын әртүрлі сұлулық бейнелерін көреміз де, бірте-бірте соларға ұқсауға тырысамыз. Бірақ әлеуметтік желідегі мінсіз көрінетін адамдардың өзі күнделікті өмірде дәл экрандағыдай бола бермейді.

Менің ойымша, косметика қолданудың еш жамандығы жоқ. Егер қыз бала макияж жасағанды ұнатса, одан өзін сенімді сезінсе, бұл — оның жеке таңдауы. Бірақ косметикасыз өзіңді әдемі емес сезіну немесе біреудің пікірі үшін бояну дұрыс емес деп ойлаймын. Себебі адамның сұлулығы тек сыртқы келбетімен өлшенбейді. Кейде біз өзгелердің біз туралы не ойлайтынына тым көп мән беріп, өзіміздің шын мәнінде қандай екенімізді ұмытып кетеміз.

Қорытындылай келе, косметика адамның сұлулығын ерекшелеуге көмектесуі мүмкін, бірақ ол адамның құндылығын анықтамайды. Ең бастысы — өзіңді өзгелермен салыстырмай, өз келбетіңді қабылдай білу. Косметиканы өзімізге ұнау үшін қолдансақ жақсы, ал өзгелерге ұнау үшін өзімізді өзгертуге мәжбүр болсақ, онда бір сәт ойланып көргеніміз дұрыс. Өйткені шынайы сұлулық біреудің бағасынан емес, адамның өзіне деген көзқарасынан басталады.

АБДИРАЗАКОВА  Кәусар,

Алматы облысы, Кеген ауданы,

Кеген ауылы, «Ө. Жанабаев» атындағы орта

 мектептің 11-сынып оқушысы.

 

Сәйкес жаңалықтар

«Табиғатты қорғау – әр азаматтың парызы»

farabi shakirti shakirti

Бақытты сатып алуға бола ма?

Кітап оқымаған ұрпақ — тамыры әлсіз қоғам

farabi shakirti shakirti