Сурет: ЖИ, жолдаған автор
ҰБТ – жас түлектердің ең үлкен қорқынышы сияқты көрінеді. Бірақ шын мәнінде, ҰБТ қорқатын дүние емес, ол – жай ғана тест. Оны дәл осылай қабылдау адамға сенімділік береді әрі артық уайымнан арылтады.
ҰБТ-ға дайындықты 10-сыныптан бастап, ақырын әрі жүйелі жүргізген тиімді. Ал егер 11-сыныпта бастаған болсаң да, еш уайымдама – әлі де кеш емес. Ең бастысы – дұрыс жоспар мен тұрақтылық.
ҰБТ тапсырушыларға жиі айтылатын бір сөз бар:
«Аз-аздан, бірақ үздіксіз».
Бір күнде бірнеше сағат оқып, кейін мүлде дайындалмай қою нәтиже бермейді. Ал күн сайын аз болса да, тұрақты түрде дайындалу үлкен жетістікке жеткізеді. Себебі кішкентай қадамдардың өзі уақыт өте үлкен нәтижеге айналады.
Дайындық барысында ең алдымен өз деңгейіңді анықтап алған дұрыс. Қай пән саған жеңіл, қай тақырып қиын – соны біліп, әлсіз тұстарыңмен көбірек жұмыс істеу керек. Сонымен қатар, уақытты дұрыс басқару да өте маңызды. Әлеуметтік желі мен бос уақытқа кететін сағаттарды азайтып, болашағыңа көбірек көңіл бөлген жөн.
Кейде шаршау, мотивацияның жоғалуы немесе төмен нәтиже болуы мүмкін. Бірақ дәл сондай сәтте берілмеу маңызды. Себебі кез келген үлкен нәтиженің артында үздіксіз еңбек тұрады.
Сонымен қатар, өзіңді өзгемен салыстырудың қажеті жоқ. Әркімнің оқу қарқыны мен мүмкіндігі әртүрлі. Бастысы – кеше қандай болсаң, бүгін одан бір қадам алда болу.
ҰБТ – алынбайтын қамал емес. Сенім, еңбек және тұрақтылық арқылы кез келген мақсатқа жетуге болады. Ең бастысы – өзіңе сену және ешқашан тоқтамау.
ДАУКЕЕВА Алима,
Алматы облысы, Қарасай ауданы,
«Ұлан орта мектебі» 11 – сынып оқушысы