Сурет: ашық дереккөзінен алынды.
Журналистика – қоғамның айнасы. Ал мақала – сол айнадағы көріністі халыққа түсінікті тілмен жеткізетін құрал. Бүгінгі таңда біз ақпаратты көбіне әлеуметтік желіден, жаңалық сайттарынан, теледидардан аламыз. Бірақ сол ақпараттың артында үлкен еңбек бар. Ол – журналистердің еңбегі.
Журналист болу оңай емес. Олар күн сайын түрлі тақырыптарды зерттеп, адамдармен сөйлесіп, нақты дерек жинайды. Мақала жазу үшін тек жазу қабілеті ғана емес, жауапкершілік те керек. Себебі бір қате ақпарат көптеген адамды шатастыруы мүмкін. Сондықтан журналист әрқашан шындықты айтуға тырысады.
Мақаланың түрлері де әртүрлі болады. Мысалы, ақпараттық мақала – болған оқиғаны қысқа әрі нақты жеткізеді. Ал талдамалық мақала – мәселені тереңірек түсіндіріп, себеп-салдарын ашады. Сонымен қатар, пікірлік мақалалар да бар. Онда автор өз ойын білдіреді, бірақ оны дәлелмен жеткізуі керек.
Қазіргі жастар да журналистикаға қызыға бастады. Себебі бұл мамандық арқылы қоғамға әсер етуге болады. Бір жақсы жазылған мақала адамдардың ойын өзгертіп, маңызды мәселелерге назар аударта алады. Мысалы, экология, білім, жастар мәселесі сияқты тақырыптар жиі көтеріледі.
Бірақ журналистикада қиындықтар да бар. Кейде уақыт аз болады, кейде ақпаратты табу қиынға соғады. Кейбір адамдар сұхбат беруден бас тартады. Осындай сәттерде журналист сабырлы болып, басқа жолын табуы керек. Бұл мамандық табандылықты талап етеді.
Сонымен қатар, қазіргі заманда жалған ақпарат көп тарайды. Оны «фейк» деп атайды. Мұндай ақпаратқа сеніп қалмас үшін әр адам деректі тексеруді үйренуі керек. Ал журналистер үшін бұл – басты міндеттердің бірі. Олар тексерілген, нақты ақпарат беруге тырысады.
Мақала жазу – тек ақпарат беру емес, ол оқырманмен байланыс орнату. Жақсы мақала оқырманды ойландырады, кейде әсер етеді, тіпті әрекет жасауға итермелейді. Сондықтан тілдің қарапайым әрі түсінікті болуы өте маңызды. Қиын сөздер мен ұзын сөйлемдер оқырманды жалықтыруы мүмкін.
Қорытындылай келе, журналистика – маңызды әрі жауапты сала. Ал мақала – сол саланың негізгі құралы. Қоғамда не болып жатқанын білу үшін біз журналистерге сенеміз. Сондықтан олардың еңбегін бағалау керек. Ал егер сен де жазуға қызықсаң, мақала жазып көр. Мүмкін, сен болашақта
мықты журналист боларсың.
ДОСАЛИЕВА Несібелі,
Қызылорда облысы, Жаңақорған ауданы
«№223 орта мектебінің» 11сынып оқушысы.