Қаламым – қаруым, сөзім – жүрегімнің лебі!

Әбу Насыр әл-Фараби:

 «Өз ісіңнің білгірі, һәм шебері атану үшін

жақсы жұмыс істеп, жетік білуге ұмтылу керек».

Республикалық «Farabi shakirti» журналында жас тілші атану – бұл маған берілген киелі аманат. Әр сөздің артында жауапкершілік тұр. Әр жолдың аяғында оқырманның үміті тұр. Мен бұл жүкті арқалауға дайынмын. Себебі жеңіл сөз желмен кетеді, ал салмақты сөз ғасырларға жете алады.

Ізденген сайын көкжиегім кеңейіп, оқыған сайын ойым тереңдей түсті. Адамдардың өміріне құрметпен кіріп, олардың сырын сөзге айналдыру – үлкен өнер. Мен бұл өнерді жаныма сіңіріп келемін.

Жазу – менің рухани тәрбием. Ол маған әр ойды таразылауды, әр сөйлемді сұрыптауды, әр абзацты саралауды үйретті. Ерінбей жазамын, жалықпай ізденемін. Ізденіс тоқтаған жерде тіршілік те тоқтайды. Мен өсу үшін жазамын, өзгеру үшін жазамын, оқырманға әсер ету үшін жазамын.

Осы орайда «Farabi shakirti» журналының барша ұжымына шын жүректен алғысымды білдіргім келеді. Сіздер маған тек тілшілік мәртебе беріп қана қоймай, сөздің қадірін, қаламның қуатын, ойдың тереңдігін ұғындырдыңыздар.

«Өз ісіңнің білгірі, һәм шебері атану үшін жақсы жұмыс істеп, жетік білуге ұмтылу керек», – деген Әбу Насыр әл-Фараби сөзі мен үшін жай нақыл емес, бағыт-бағдар. Бұл – күн сайын өз-өзіме қоятын талап, әр жазған жолыма артатын жауапкершілік.

Мен бүгін сол жолдың басында тұрмын. Ізденуді тоқтатпай, сөздің салмағын сезініп, ойдың анықтығына ұмтылып келемін. Өйткені нағыз шеберлік бір күнде келмейді, ол табандылықпен, уақытпен, үздіксіз еңбектің нәтижесінде қалыптасады.

                                                                                                    Аружан МӘУЛІТ,

                                                                       Алматы  қаласы Білім  басқармасының

«№13 мектеп-гимназияның» 11-сынып оқушысы.

Республикалық «Farabi  shakirti» журналы

мен  www.farabishakirti.kz  желілік басылым

сайтының   Жас  тілшісі