Бүгінгі таңда интернет адам өмірінің ажырамас бөлігіне айналды. Әсіресе жастар күнделікті уақыттарының көп бөлігін әлеуметтік желілерде өткізеді. Бұл құбылыс білім алуға және ақпарат алмасуға көмектескенімен, кей жағдайда үлкен мәселеге де айналып отыр. Мамандардың айтуынша, жасөспірімдердің көпшілігі күніне бірнеше сағат бойы телефон немесе компьютер қолданады. Әлеуметтік желілер, онлайн ойындар және түрлі платформалар жастарды өзіне тартып, уақытты тиімді пайдалануға кедергі келтіреді. Нәтижесінде кейбір оқушылардың оқу үлгерімі төмендеп, денсаулығына да зиян келуі мүмкін.
Психологтардың пікірінше, интернетке тәуелділік адамның психологиялық жағдайына әсер етеді. Ұзақ уақыт экранға қарау көздің көру қабілетін нашарлатып, ұйқы режимінің бұзылуына әкеледі. Сонымен қатар шынайы қарым-қатынас азайып, адамдар арасында әлеуметтік байланыс әлсіреуі мүмкін.
Бұл мәселені шешу үшін ата-аналар мен мұғалімдердің рөлі өте маңызды. Олар жастарды спортпен айналысуға, кітап оқуға және пайдалы хоббилермен айналысуға ынталандыруы тиіс. Сонымен қатар интернетті дұрыс және шектеулі пайдалану мәдениетін қалыптастыру қажет.
Қорытындылай келе, интернет қазіргі қоғам үшін маңызды құрал. Алайда оны дұрыс пайдаланбау
жастар арасында тәуелділік мәселесін туғызуы мүмкін. Сондықтан әр адам өз уақытын тиімді жоспарлап, интернетті пайдалы мақсатта қолдануы қажет.
НҰРДІЛДА Зарина Ғабитқызы,
Астана білім басқармасының
«№99 жалпы орта мектебінің»
11 – сынып оқушысы