Абай облысының полициясы мессенджерлер мен чаттарда террорлық актілер туралы жалған ақпараттың таралуына байланысты мәлімдеме жасады. Бұл туралыөңірілік полиция департаментіне сілтеме жасаған KAZ.NUR.KZ хабарлайды.
«Мессенджерлер мен чаттарда мектептерде террорлық актілер дайындалып жатқаны туралы жалған ақпарат таралып жатыр. Аталған мәліметтер шындыққа жанаспайды және халық арасында үрей мен алаңдаушылық туғызуға бағытталған.
Полиция департаменті азаматтарды сабыр сақтауға, арандатушылыққа берілмеуге және тек ресми ақпарат көздеріне сенуге шақырады», — делінген хабарламада.
Полиция өкілдері терактілер туралы көрінеу жалған ақпарат тарату қылмыстық жауапкершілікке әкеп соғатынын еске салды.
«Қолданыстағы заңнамаға сәйкес, мұндай әрекет үшін 18 миллион теңгеге дейін айыппұл салу немесе бес жылға дейін бас бостандығынан айыру жазасы көзделген.
Құрметті ата-аналар! Осы ақпаратты балаларыңызға түсіндіріңіздер. Абайсызда жасалған әрекеттер ауыр құқықтық салдарға әкелуі мүмкін», — делінген хабарламада.
Автор: Гүлмира Ерубаева