11 «Б» — бұл жай ғана сынып емес.
Бұл — балалықтың ең әдемі естелігі.
Мектеп…
Кейде шаршап келіп, тезірек үйге қайтқымыз келетін орын сияқты көрінетін. Бірақ уақыт өте келе дәл сол мектептің ең қымбат мекенге айналғанын түсінеді екенсің. Әсіресе, 11 «Б» сыныбы үшін бұл жылдардың орны ерекше.
Біз бірге күлдік. Бірге ренжідік. Сабақтан шаршап отырсақ та, бір-бірімізді көргенде көңіліміз көтеріліп кететін. Кейде ұрысып қалып, артынша қайта татуласатынбыз. Себебі біз жай ғана сынып емес, бір-біріне үйреніп кеткен үлкен отбасы секілді болдық.
11 жыл ішінде қаншама естелік жиналды…
Алғашқы қоңырау, алғашқы достар, соңғы қоңырауға дайындық, дәліздегі күлкі, сабақтағы қызықтар, мұғалімдердің ескертулері – бәрі енді тәтті естелікке айналып бара жатыр. Қазір осы сәттердің қадірін бұрынғыдан да қатты сезінеміз.
Әрқайсымыздың мінезіміз әртүрлі болса да, бізді біріктірген ортақ бір дүние болды – ол біздің сыныбымыз. 11 «Б» -ның дауысы, энергиясы, шуы, күлкісі мектепте ерекше болып қалатын сияқты. Кейде тым қатты сөйлеп кетсек те, тым ерке болсақ та, осы қалпымызбен бір-бірімізге ыстық болып кеттік.
Алда бәріміздің жолымыз әртүрлі болмақ. Біріміз студент атанамыз, біріміз арман қуып басқа қалаға кетеміз. Бірақ мектеп қабырғасындағы осы достық, осы естеліктер ешқашан ұмытылмайды. Уақыт өтсе де, 11 «Б» деген ат жүрегімізде ерекше орын алып қала береді.
Бәлкім, жылдардан кейін қайта кездескенде дәл қазіргі күндерді сағынып еске алармыз. Сонда біз үшін ең қымбат кезеңдердің бірі осы мектеп уақыты болғанын түсінерміз.
Бұл мақала Амантай Айманнан 11 «Б» сыныбына арналады.
20.05.2026 жыл.
Абай облысы, Үржар ауданы, Үржар ауылы,
«Бауыржан Момышұлы атындағы» КММ ОМ