Рәміздерім — ұлттың басты нышаны
БӨКЕН Қазбек Маратұлы,
филолог-ақын
Әнұраным жігерімді жаниды,
Қазақ елін бүкіл әлем таниды.
Гүлдендірді, түрлендірді жерімді,
Елін сүйген азаматтар жаны игі.
*Елтаңбам мен елдігімді бәрі ұққан,
Айналайын қазақ деген халықтан.
Күн бейнелі шаңырағым нұр шашып,
Уықтары бірлігімді танытқан.
*Жұлдызым тұр жарқыраған жоғары,
Қонақжаймыз арылмаған қонағы.
Мызғымаса бірлігім мен тірлігім,
Бағымыз боп, бақыт құсы қонады.
*Ай мүйізді алтын қанат пырағым,
Қайсарлықтың бейнесі деп ұғамын.
Бабалардың рухынан қуат ап,
Бейбітшілік күзетінде тұрамын.
*Көгілдір ту бейбіт ашық аспандай,
Күн шуағын қазағыма шашқандай.
Қыранымыз қалықтаған биікте,
Асқар шыңға жол көрсетіп ашқандай.
*Ою-өрнек туға көрік береді,
Ел өнерін жаһан көріп келеді.
Сайысқанда өнер-білім, спорттан,
Ту соңынан ұл мен қызым ереді.
*Рәміздерім — ұлттың басты нышаны,
Адал досқа ашық қазақ құшағы.
Көздегенін бағындырған қырандай,
Шың-құз асып, көкте биік ұшады.
Қарағанды облысы, Абай ауданы, Курмин ауылы
Курмин жалпы білім беретін мектебі
Дереккөзі: https://bilim-all.kz/olen/4890-ramizderim-ulttyn-basty-nyshany