Әр адамның өз қызығушылығы және сүйікті ісі бар. Сіздің қандай сүйікті ісіңіз бар? Мысалы,сурет салу ма? Тіл үйрену ме? Ән тыңдау ма? Әрине, әр адамдікі әртүрлі. Өзімнің сүйікті ісіммен яғни, хоббилеріммен бөліссем деймін.

Әуелі, «хобби» деген не екенін біліп алсақ.

Хобби – адамның бос уақытында айналысатын сүйікті ісі. Өзі қалаған, ұнатқан іс — әрекеттер. Хобби – адамның ой — өрісін кеңейтіп, шығармашылық қабілетін арттырады. Сүйікті үш хоббиімді айта отырайын.

Ең біріншісі. Кітап оқу – адамның көкжиегін кеңейтіп, есте сақтау қабілетін жақсартады, сөздік қоры мол болады және ойлауды дамытады. Кітап оқығанды жаным сүйеді. Күнделікті үздіксіз кітап оқимын,кем дегенде 10-15 бет. Әсіресе, қазақ әдебиеті кітаптарын жиі оқимын. Осы уақытқа дейін роман, үзінді, шағын әңгіме жинақтарын көп оқыдым. Мысалы: «Қызыл жебе», Болмаған балалық шақ», «Гауһар тас», «Мәңгілік бала бейне», «Сүйекші», «Бақытсыз Жамал» және т.б

Ал екіншісі. Театр – адамдардың демалып және рухани азық жинап қайтатын мәдени орын. Соңғы бір жылда театрға қызығушылығым арта түсті. Тіпті хоббиіме айналды десем артық емес. Әр айда кемі бір рет барып тұру мен үшін үйреншікті жағдай болды. Актёрлармен сұхбаттасып, жеке сөйлесіп және олардың дайындық барысын көру, сезіну маған да бұйырыпты. Маған ерекше әсер еткен, ұнаған,басқаша сезім сыйлаған қойылымдарды атап айтайыын.  «Мұқағали»,  «Музаға», «Мәңгілік бала бейне», «Қара», «Әпке», «Болмаған балалық шақ» қойылымдары. Және сіздерді де театрға баруға шақырамын. Демалып,керемет әсер алып қайтқанға не жетсін.

Үшіншісі: Спорт – денсаулық кепілі. Спортпен шұғылданған адамның денсаулығы мықты болмақ. Спорттың түр — түрі бар екендігі барлығына мәлім. Ал әр адам әр түрлі спорт түрін ұнататыны айдан анық. Менің ұнататын спортым ол – футбол. Футбол – менің хоббиім. Бұл спорт түрімен 8 жасымнан бері шұғылданып келемін. Аптасына 2-3 рет ойнап тұрамын, бірақ мүлдем тастаған емеспін. Көптеген жарыстарға қатысып жүлделі орындарға ие болдық. Футбол барлық уайым қайғыны ұмыттыратын және эмоцияға толы спорт түрі.

Сүйікті хоббиіңізбен айналыссаңыз күйзелістен аулақ және керемет өмір сүресіз. Хобби – шексіз нәрсе,өміріңізді әсемдейді. Өз сүйікті хоббиіңізді тауып, өміріңізге жарқын сәттер сыйлаңыз.

Диас  САТЫБАЛДЫ,

                                                Алматы қаласы, Абай атындағы Республикалық

мамандандырылған дарынды балаларға

арналған мектеп – интернатының 11 — сынып оқушысы.