? Сурет: ЖИ көмегімен жасалынды
(Жасанды интеллект)
Жолдаған: автор АБДИРАЗАКОВА Кәусар
«Ауылдан адам көшкенмен, адамнан ауыл көшпейді» деген өлең жолдары бар. Бірақ бүгінгі жастардың өміріне қарасақ, туған жерінен алыстап бара жатқандар аз емес. Бірі оқуға кетеді, бірі жұмыс іздейді, енді бірі ауылда болашағын көрмегендіктен қалаға бет алады. Сонда жастар ауылдан кеткісі келе ме, әлде ауылда қалуға мүмкіндік аз ба?-деген сұраққа жауап беріп көрейікші.
Қазір көп жас жақсы білім алып, өз еңбегімен ақша тауып, ешкімге тәуелді болмай өмір сүргісі келеді. Бұл – қалыпты арман. Алайда ауылда барлық адамның қалаған мамандығы бойынша жұмыс табуы оңай емес. Кейбірі қанша тырысса да, өзіне лайық мүмкіндік таппайды. Ақырында туған жерін қимаса да, басқа жаққа кетуге мәжбүр болады.Әрине, ауылдан кеткендердің бәрін ауылын ұмытты деп айтуға болмайды. Керісінше, олардың арасында білім алып, тәжірибе жинап, кейін туған жеріне пайдасын тигізгісі келетіндер де бар. Бірақ бір сұрақ туындайды: жастар ауылда қалғысы келсе, оларға қандай мүмкіндік жасалып отыр?
Қазақстанның Ұлттық статистика бюросы еңбек нарығы мен жұмыспен қамту туралы мәліметтер жариялап отырады. Мұндай деректер ауыл жастарының жағдайын түсінуге көмектеседі. Дегенмен мәселені тек сандармен өлшеу жеткіліксіз. Әр санның артында өз арманы, мақсаты және шешім қабылдауға мәжбүр болған бір адам тұр.Меніңше, ауылда қалу амалсыздыққа айналмауы керек. Жас адам туған жерінде де жақсы жұмыс істеп, өз кәсібін ашып, болашағын құра алса, ауылдың дамуына өзі де үлес қосады. Ол үшін ауылға тек жаңа ғимараттар емес, жастарға қажет жұмыс орындары, білім алу мүмкіндіктері және бастамаларды қолдайтын орта керек.
Ауылда қалу да, қалаға кету де ұят емес. Ең маңыздысы – адамның өз таңдауын еркін жасай алуы. Бірақ туған жерінде қалғысы келген жас мүмкіндік таппай, амалсыз кетсе, бұл туралы ойлануымыз керек. Себебі ауылдың болашағы жастардың туған жерін қаншалықты жақсы көретініне ғана емес, сол жерде өмір сүруге қаншалықты жағдай жасалғанына да байланысты.
АБДИРАЗАКОВА Кәусар,
Алматы облысы, Кеген ауданы,
Кеген ауылы, «Ө. Жанабаев» атындағы орта
мектептің 11-сынып оқушысы.
Пайдаланылған ақпарат көзі:
- Қазақстан Республикасы Ұлттық статистика бюросы – еңбек нарығы және жұмыспен қамту статистикасы:
https://stat.gov.kz/industries/labor-and-income/stat-empt-unempl
