Нұрасылдың тамшыдай көмегі су жайылған жағалауға таудай тосқауыл болсын дейміз. Еліміздің он облысындағы қарғын су басып, адамдардың эвакуацияланғанын, бүкіл ел болып гуманитарлық көмек жөнелтіп жатқанын естіген бастауыш сынып оқушысы ата – анасы берген ақшаны жинап жүргенін айтты. Аз болса да бір кәдеге жарасын деп ата – анасына қолқа салып, Құлсарыға қаражат жібергісі келетінін айтқан. Олар да баласының жүрегіндегі мейірімді, бауырмал, жанашырлық сезіміне қайран қалып, гуманитарлық көмек жинап жатқан орынға алып келген.
Нұрасыл бұл көмегін Құлсары халқына жеткізуін өтінді.
М. Әбдіхалықов атындағы мектеп-гимназиясының 4-сынып оқушысы Нұрасыл Игілікұлы жұрттың ризашлығына бөленіп, үлкендердің батасын алды. Еліміздегі су тасқыны бастауыш сынып оқушысын да күрсіндірді. Себебі, қарғын судан тек ересектер ғана емес, өзімен жасты балалар да зардап шегіп жатыр. Маңғыстау облысы Ақшұқыр ауылынан Құлсарыға аттанатын көмек туралы естіген Нұрасыл арнайы жинап жүрген қаражатын мұқтаж жандарға беріп жіберді, деп хабарлайды Egemen.kz.
Балақай тасқын судан зардап шеккен халыққа арнайы құтыда жинаған тиын-тебенін жіберді. Аз да болса көптей көрген халық Нұрасылға алғысын жаудырып жатыр.
«Құлсарыдағы ағаларыма, бауырларыма осы тиынды бергім келіп отыр. Қобдишаға жинап жүрген тиыным еді. Енді оны сіздерге табыстаймын, бауырларыма жеткізіп берсеңіздер деймін», деді Нұрасыл Игілікұлы өзінің видеоүндеуінде.
Желі қолданушылары баланың бұл ісін мақтап, «елім деген жүрегіңнен айналайын», «өркенің өссін!», «жарайсың!», «аман жүр, өзіңе еселеніп қайтсын!» деген сарында жылы лебізін білдіріп жатыр.
Фото: ТЖМ, Алатау ақпараты
