Сурет: ЖИ, жолдаған автор
Тәуелсіздік – бұл жай ғана саяси мәртебе немесе картадағы шекара емес. Бұл – халықтың өз тағдырын өзі айқындау, ана тілінде сөйлеу, рухын сақтау және болашағын өз қолымен құру құқығы. Менің ойымша, тәуелсіздік – кез келген ұлт үшін ең қымбат құндылық, өйткені онсыз өзге игіліктердің бәрі – білім, байлық, мәдениет – тұрақты әрі толыққанды бола алмайды.
Тарихқа көз жүгіртсек, тәуелсіздіктің қаншалықты қиын жолмен келгенін аңғарамыз. Қазақ халқы ғасырлар бойы азаттық үшін күресіп, сан рет жойылу шегіне жетіп, қайта түледі. Жоңғар шапқыншылығы кезіндегі «Ақтабан шұбырынды» оқиғасы, патшалық Ресейдің отарлау саясаты, кеңестік дәуірдегі саяси қуғын-сүргін мен ашаршылық – бәрі де ұлттың табандылығы мен тәуелсіздікке деген ұмтылысын сынаған сындарлы кезеңдер еді. 1986 жылғы Желтоқсан көтерілісі – қазақ жастарының еркіндік рухының айқын көрінісі. Осы оқиғалар тәуелсіздіктің бізге оңайлықпен келмегенін, оның құны қанмен, термен және сан ұрпақтың арманымен өлшенетінін дәлелдейді.
Тәуелсіздік – рухани және мәдени дамудың негізі. Өз тілің мен діліңді сақтау, өткеніңді зерттеу, ұлттық болмысыңды ұрпаққа жеткізу – тек азат елде ғана толыққанды жүзеге асады. Мемлекетіміз егемендік алғаннан кейін қазақ тіліне мемлекеттік мәртебе берілді, тарихи есімдер қайта оралды, ұлттық салт-дәстүрлеріміз жаңғырды. Мысалы, Наурыз мейрамының қайта тойлана бастауы – рухани тәуелсіздіктің бір символы. Егер ел тәуелді болса, оның мәдениеті бірте-бірте жойылып, ұрпағы өз тамырынан ажырап, мәңгүртке айналады.
Сонымен қатар, тәуелсіздік – азаматтардың әл-ауқаты мен болашаққа деген сенімінің кепілі. Егемен ел ғана өз жер қойнауындағы байлықты халқының игілігіне жаратып, білім мен ғылымды ұлттық мүддеге сай дамыта алады. Бүгінде қазақстандық жастар әлемнің үздік университеттерінде «Болашақ» бағдарламасы арқылы білім алып, Отанына қызмет етуде. Бұл – тәуелсіз мемлекеттің өз азаматтарына сеніп, олардың әлеуетін дамытуға жасаған мүмкіндігі.
Әрине, тәуелсіздік – тек құқық қана емес, үлкен жауапкершілік. Оны күнделікті еңбекпен, біліммен және бірлікпен нығайту – әрбір азаматтың міндеті. Елдің тұрақтылығы мен қауіпсіздігі әрқайсымыздың саналы таңдауымызға байланысты.
Қорыта айтқанда, тәуелсіздік – халықтың жаны мен ары, еңсесін тіктеген берік тірегі. Өткен тарихымыз азаттықтың қадірін ұмытпауға үйретсе, бүгінгі жетістіктеріміз соның арқасында мүмкін болды. Сондықтан тәуелсіздік – әрбір ұрпақ саналы түрде қорғап, қастерлейтін ең қымбат құндылық.
АМАНОВА Қазына,
Шымкент қаласы, «132 ЖОББМ» түлегі.
Республикалық «Farabi shakirti» журналы
мен www.farabishakirti.kz желілік басылым
сайтының Жас тілшісі
