Сурет: ЖИ, жолдаған автор
Қазіргі қоғамда жалғыздық туралы көп айтылады. Кей адамдар жалғыз қалудан қорқады, ал кейбірі керісінше тыныштықты жақсы көреді. Біреу үшін жалғыздық – ауыр сезім болса, енді біреу үшін демалыс пен еркіндік. Сондықтан «жалғыздық жаман нәрсе ме» деген сұраққа біржақты жауап беру қиын.
Адам – қоғамда өмір сүретін жан. Ол әрқашан біреумен сөйлескісі, ойын бөліскісі келеді. Достармен әңгімелесу, отбасының қолдауы адамға күш береді. Егер адам ұзақ уақыт ешкіммен араласпай жүрсе, өзін керексіз сезінуі мүмкін. Кейде дәл осы сезім адамның көңіл күйіне әсер етеді. Ол мұңайып, ішкі жалғыздықты сезіне бастайды. Сондықтан толық оқшаулану адамға ауыр тиеді.
Бірақ жалғыздықтың жақсы жағы да бар. Кейде адамға өзімен өзі қалу қажет. Күнделікті шу, сабақ, жұмыс, әлеуметтік желі адамды шаршатады. Осындай кезде тыныштық адамға ойлануға мүмкіндік береді. Жалғыз қалған адам өз ойын тыңдайды, армандарын саралайды, болашағы туралы ойланады. Кейбір адамдар шығармашылықпен де жалғыз кезде жақсы айналысады. Мысалы, жазушылар, суретшілер немесе музыканттар тыныштықта шабыт алады.
Қазіргі жастар көбіне әлеуметтік желі арқылы араласады. Сырттай қарағанда олардың достары көп сияқты көрінеді. Бірақ шынайы өмірде ішкі жалғыздық сезімі болуы мүмкін. Адам жүздеген адаммен сөйлессе де, өзін түсінетін жан таппауы мүмкін. Сондықтан жалғыздық әрқашан адамның қасында ешкімнің болмауы емес. Кейде адамның ішкі дүниесін ешкім түсінбеуі де жалғыздыққа әкеледі.
Сонымен қатар жалғыздық адамды күшейте алады. Өмірде әрдайым қасыңда біреу бола бермейді. Кей сәттерде адам өз мәселесін өзі шешуге үйренеді. Бұл оның мінезін қалыптастырады. Өз бетімен ойлау, шешім қабылдау да маңызды қасиет. Егер адам жалғыздықтан қорықпаса, ол өзіне сенімді бола бастайды.
Алайда жалғыздықты тым жақсы көріп кету де дұрыс емес. Адам қоғамнан алыстап кетсе, қарым-қатынас жасау қиындайды. Кейде адам ішіндегі мәселесін ешкімге айтпай, бәрін ішінде сақтайды. Бұл уақыт өте келе психологиялық қиындықтарға әкелуі мүмкін. Сондықтан адамға жақын адамдармен сөйлесу, сезімін бөлісу маңызды.
Қорытындылай келе, жалғыздық – толықтай жаман нәрсе емес. Оның пайдалы жағы да, зиянды жағы да бар. Кейде жалғыздық адамға тыныштық пен ой сыйласа, кейде мұң мен сағыныш әкеледі. Ең бастысы – жалғыздық пен қоғам арасындағы тепе-теңдікті сақтау. Адам өзімен де, өзгелермен де дұрыс байланыс орната білсе, ол өзін бақытты сезінеді.
ДОСАЛИЕВА Несібелі,
Қызылорда облысы, Жаңақорған ауданы
«№223 орта мектебінің» 11сынып оқушысы.