Қазіргі ақпараттық технологиялар дамыған заманда кітаптың орны ерекше болып қала береді. Ғаламтор мен әлеуметтік желілер ақпарат алудың жылдам көзіне айналғанымен, кітап адамды терең ойлауға, талдауға және рухани тұрғыдан жетілуге баулиды. Сондықтан бүгінгі қоғамда кітап оқу мәдениетін қалыптастыру маңызды міндеттердің бірі болып саналады. Бұл бағытта Қызылорда облысында жүзеге асырылып жатқан жобалар мен шаралар өңірдегі жастардың кітапқа деген қызығушылығын арттыруға үлкен үлес қосып келеді.
Қызылорда өңірі ежелден білім мен мәдениеттің орталығы ретінде танылған. Облыста кітапханалар жұмысы жаңартылып, жастардың кітапқа қызығушылығын арттыру мақсатында түрлі жобалар ұйымдастырылуда. Әсіресе мектеп оқушылары арасында өткізілетін кітап оқу жарыстары мен әдеби байқаулар жастардың танымын кеңейтіп, кітапқа деген сүйіспеншілігін қалыптастыруда. Қазіргі таңда көптеген оқушылар бос уақытын әлеуметтік желіде өткізудің орнына кітап оқуға бет бұра бастады.
Соңғы жылдары Қызылорда облысында кітап оқуды насихаттайтын ауқымды шаралар көбейді. Соның бірі — мектеп оқушылары арасында ұйымдастырылған кітап оқу жобалары. Бұл жобалар аясында оқушылар қазақ тарихы мен мәдениетіне қатысты құнды еңбектерді оқып, өзара пікір алмасып, білімдерін сынайды. Мәселен, 2025 жылы Қызылордадағы №2 облыстық мамандандырылған мектеп-лицей-интернатында Санжар Керімбайдың «Қаныш және ғылыми майдан» кітабы бойынша ғылыми конференция өткізілді. Шараның мақсаты — қазақтың тұңғыш академигі Қаныш Сәтбаевтың өмірі мен ғылыми жетістіктерін жас ұрпаққа таныстыру болды. Оқушылар кітап мазмұнын талдап, ғалымның ғылым жолындағы еңбегіне баға берді.
Мұндай жобалар оқушыларды тек кітап оқуға ғана емес, ұлттық құндылықтарды тануға да үйретеді. Соңғы уақытта жастар арасында «Қаныш және ғылыми майдан», «Өзбекәлі және мәдени майдан», «Жәнібек және жер майдан» секілді кітаптар кеңінен оқылуда. Бұл еңбектер тарихи тұлғалардың ел дамуына қосқан үлесін танытып, жастардың отансүйгіштік қасиеттерін нығайтады. Осындай шығармаларды оқу арқылы оқушылар тарихты терең түсініп, ұлт тағдырына бейжай қарамауға үйренеді.
Қызылорда қаласында кітап оқуды дәріптейтін фестивальдер де тұрақты өткізіліп келеді. «Kitap Time» республикалық кітап фестивалі өңірдегі ең маңызды мәдени шаралардың біріне айналды. Фестивальдің негізгі мақсаты — қоғамда кітап оқу мәдениетін дамыту және кітаптың құндылығын насихаттау. Шара барысында кітап көрмелері, әдеби кездесулер, авторлармен сұхбаттар ұйымдастырылады. Мұндай іс-шаралар жастардың әдебиетке деген қызығушылығын арттырып, кітаптың қоғамдағы маңызын түсіндіруге мүмкіндік береді.
Сонымен қатар Қызылордада оқушылар арасында түрлі зияткерлік сайыстар өткізіліп тұрады. Соның бірі — «Kitap Qurttary Quiz» сайысы. Бұл жарысқа ондаған мектептің оқушылары қатысып, оқыған кітаптары бойынша білімдерін сынайды. Осындай жобалар жасөспірімдерді ізденуге, жаңа кітаптар оқуға және өз ойын еркін жеткізуге үйретеді.
Кітап оқу мәдениетінің дамуына облыс кітапханалары да үлкен үлес қосып келеді. Ә.Тәжібаев атындағы облыстық ғылыми-әмбебап кітапхана, ғылыми-техникалық кітапхана және басқа да мәдени орталықтар оқырмандарға заманауи қызмет көрсетіп, түрлі әдеби кештер мен кездесулер ұйымдастырады. Бұл кітапханалар жастардың білім алуына және өзін-өзі дамытуына қолайлы орта қалыптастырып отыр.
Кітап — адамды тәрбиелейтін, ой-өрісін кеңейтетін және өмірлік ұстанымын қалыптастыратын рухани қазына. Қызылорда облысында жүзеге асырылып жатқан кітап оқу жобалары мен мәдени шаралар осы құндылықты жас ұрпақтың санасына сіңіруге бағытталған. Білімді, саналы және рухани бай ұрпақ қалыптастыру үшін кітап оқудың маңызы әрдайым жоғары болып қала береді.
Қорытындылай келе, Қызылордадағы кітап оқу мәдениеті жылдан-жылға дамып келеді. Әртүрлі байқаулар, фестивальдер, кітапханалық жобалар мен әдеби кездесулер жастардың кітапқа деген қызығушылығын арттыруда. Кітаппен дос болған ұрпақ қана елдің болашағын жарқын ете алады. Сондықтан кітап оқу — әрбір жас үшін білімге, рухани кемелдікке және табысқа бастайтын сенімді жол.
НҰРМАШ Нұрай,
Қызылорда облысы, Қазалы ауданы,
Қожабақы ауылы
«№25 орта мектептің» 11 – сынып оқушысы.
Республикалық «Farabi shakirti» журналы
мен www.farabishakirti.kz желілік басылым
сайтының Жас тілшісі