Жер бетінде сан алуан жануарлар тіршілік етеді. Олардың әрқайсысының өзіндік ерекшелігі, мінезі мен табиғи болмысы бар. Солардың ішінде соңғы жылдары адамдардың ерекше назарын аударған бір жануар бар. Ол – үнемі күліп тұрғандай әсер қалдыратын квокка. Көпшілік оны «әлемдегі ең бақытты жануар» деп атап кеткен.
Квокканың басты ерекшелігі – оның бет-әлпеті. Аузының сәл жоғары қарай иілген пішіні мен жұмсақ көзқарасы оны үнемі күліп тұрғандай көрсетеді. Бұл – табиғаттың ерекше сыйы. Адамдар квокканы алғаш көргенде-ақ жылы әсер алып, еріксіз жымиып кетеді. Сол себепті әлеуметтік желілерде квоккамен түскен суреттер кеңінен таралып, ол тіпті «селфи жұлдызына» айналды.
Бұл сүйкімді жануар негізінен Австралиядағы Роттнест аралы аумағында мекендейді. Аралда олардың саны көп болғандықтан, квоккаларды еркін кездестіруге болады. Олар адамдардан аса қорықпайды, керісінше жақын келіп, қызығушылық танытады. Бұл қасиеті де олардың «достық пейілді» жануар ретінде танылуына себеп болды. 
ДАУКЕЕВА Алима,
Алматы облысы, Қарасай ауданы,
«Ұлан орта мектебі» 11 – сынып оқушысы