Ұлттық мақтанышымыз
Қазақтың қара домбырасы қасиетті саналады. Сол себепті, киелі аспап әр қазақтың шаңырағында төрінен орын алған. Домбыраның тарихын зерттеген ғалымдар IV ғасырда Хорезм мен Жамбылда жүргізілген археологиялық зерттеулерде табылған тасқа қашалған қос аспаптың суретінен кейін домбыраны тас дәуірінде пайда болуы мүмкін деп болжайды. Ал, ғалым Кемел Ақышев болса, б. з. б 4000 жыл бұрын салынған домбыраның суретін тапқан.
[1]Қазақтың киіз үйі, қара домбырасы және айтыс өнері әлем елдерінің ең ежелгі мұралары ретінде «ЮНЕСКО» тізіміне енгені белгілі.
Жұмагелді Нәжімеденов «Домбыраның қоңыр үні» кітабында «Майтөбе» жайлауынан (Алматы облысы, Жамбыл ауданы) көптеген суреттердің арасынан тастан қашалған көне домбыраның суретінің табылғанын жазады. Бұл тастағы суретті 1986 жылы белгілі этнограф Жағда Бабалықұлы тауыпты. [1].
Домбыра туралы мәліметтер іздегенде, еліміздің танымал ақындарының өлеңдерінен айналып өтпейміз. Шығармашылық жетекшіміз, ұстаз Жақсылық Айгерім Алдабергенқызымен бірге халқымыздың қасиетті аспабы – домбыра туралы Әбділда Тәжібаев, Тәкен Әлімқұлов, Ғафу Қайырбеков, Қалихан Бекхожин, Абдрахман Асылбеков, Жұмекен Нәжмеденов аталарымыз бен қазақтың ақын қызы Марфуға Айтқожина апамыздың өлеңдерін оқып шықтық.
Елімізде биыл сегізінші рет жыл сайын шілденің алғашқы жексенбісінде «Ұлттық домбыра» күні атап өтіледі. «Домбыра – қазақтың паспорты мен бренді». Ұлттық домбыра күні 2018 жылдың 13 маусымында бекітілген.
Домбыра – қазақ халқының ең сүйікті ұлттық аспаптарының бірі. Оның екі шегі бар және қолмен шертіп ойнайды. Домбыраның үні қоңыр да әдемі, тыңдаған сайын адамға ерекше әсер береді. Қазақ халқы ертеден күй тартып, ән айтып, өз сезімін, қуанышы мен мұңын домбыра арқылы жеткізген. Сондықтан домбыра – біздің ұлттық мәдениетіміздің символы.
Маған домбыраның құлағында ойнаған күйшілердің құлақ құрышын қандырар күйі мен дәстүрлі әншілердің мақамы өте ұнайды. Домбыраның үнін естіген сайын көңілім көтеріліп, жақсы күйге бөленемін.
ПАРДАБЕК Ақниет
Алматы облысы, Қарасай ауданы, Үштерек ауылы
«Үштерек ауылындағы №2 орта мектебі» КММ 7 «В» сынып оқушысы
Шығармашылық жетекшісі:
ЖАҚСЫЛЫҚ Айгерім Алдабергенқызы
Пайдаланған дереккөзі:
- https://informburo.kz/kaz/azatan-bryn-dombyra-bolan-dombyrany-tarihyn-blesz-be-.html
- https://adebiportal.kz/kz/news/view/dombyranyn-paida-boluy-zaily-anyz-ben-apsana
