Фото: ЖИ, жолдаған автор
«Мектеп» атты тарауды мәңгіге жауып, біз де он бір жыл білім алған алтын ұямызбен қимай-қимай қоштастық. Мектеп қабырғасында өткізген жылдарымыз қуанышқа, қызықты оқиғаларға, достыққа және ұмытылмас естеліктерге толы болды. Енді бізді үлкен өмірдің жаңа белестері күтіп тұр.
Бүгінгі таңда мектеп түлектерінің басты мақсатының бірі – Ұлттық бірыңғай тестілеуді сәтті тапсыру. ҰБТ – әр түлектің білімін бағалайтын маңызды сынақ. Бұл кезеңде мыңдаған оқушы болашақ мамандығын таңдап, армандаған жоғары оқу орнына түсу үшін аянбай еңбек етуде. Біз де солардың қатарындамыз. Кейде шаршаған сәттер болса да, алға қойған мақсатымыз бізді жігерлендіріп, жаңа жетістіктерге жетелейді.
Қазіргі түлектер – заман талабына сай білім алып жатқан, жаңашылдыққа ұмтылатын жастар. Біз тек жақсы нәтиже көрсетіп қана қоймай, еліміздің дамуына үлес қосатын азамат болуға талпынып келеміз. Себебі бүгінгі оқушы – ертеңгі маман, ел болашағын қалыптастыратын тұлға.
ҰБТ – өмір жолындағы бір ғана белес. Ол біздің тағдырымызды толықтай анықтамайды, бірақ мақсатымызға жету жолындағы маңызды қадамдардың бірі екені сөзсіз. Сондықтан әрбір түлек өз күшіне сеніп, білімін көрсетуден қорықпауы керек. Ең бастысы, еңбектену, табандылық таныту және өз арманыңа сену.
Қымбатты достарым! Біз үшін ерекше кезең басталды. Алдымызда үлкен мүмкіндіктер мен жаңа бастамалар күтіп тұр. Баршаңызға ҰБТ-дан жоғары нәтиже, таңдаған мамандықтарыңызға түсу және барлық армандарыңыздың орындалуын тілеймін. Сондай-ақ, мемлекеттік емтихандарды сәтті тапсырып, мектеп бітіру куәлігін алу арқылы бақытты болашаққа жолдама алайық! Мектепте алған біліміміз бен тәрбиеміз өмір жолында әрдайым бағыт-бағдар берсін.
Сәт сапар, жас түлек! Жолың ашық, болашағың жарқын болсын!
Аяулым БҰХАРБАЙ,
Астана қаласы,
М.Әуезов атындағы «№86 мектеп-гимназиясының»
11-сынып оқушысы
Жетекшісі: Байтугулова Кульбаршин Калидулаевна,
қазақ тілі мен әдебиеті пәнінің мұғалімі