Ахмет Байтұрсынұлы:
«Ел бүгіншіл, менікі ертең үшін».
Қазақ халқының тарихында ел тағдыры үшін күрескен, ұлттың ертеңін ойлаған ұлы тұлғалар аз емес. Солардың бірі — Алаш зиялылары. ХХ ғасырдың басында олар қазақ елінің тәуелсіздігі, білімі мен мәдениеті үшін аянбай еңбек етті. Алаш қайраткерлері халықты оятуды, білімге шақыруды және ұлттық сананы қалыптастыруды басты мақсат етті.
Алаш қозғалысының көшбасшыларының қатарында Әлихан Бөкейхан, Ахмет Байтұрсынұлы, Міржақып Дулатұлы сияқты ірі тұлғалар болды. Олар қазақ халқының азат өмір сүруін армандап, елдің дамуы үшін қызмет етті.
Ахмет Байтұрсынұлы:
«Ел бүгіншіл, менікі ертең үшін» — деп, болашақ ұрпақтың тағдырын біліммен байланыстырған. Бұл сөз Алаш зиялыларының негізгі мақсатын айқын көрсетеді. Олар халықты қараңғылықтан алып шығып, өркениетті елдердің қатарына қосуды көздеді.
Алаш зиялылары тек саясатпен ғана айналысқан жоқ. Олар мектеп ашып, кітап жазып, газет шығарды. Қазақ тілінің дамуына, әдебиеттің қалыптасуына және ұлттық мәдениеттің сақталуына зор үлес қосты. Сол кезеңдегі қиындықтарға қарамастан, олар өз идеяларынан бас тартпады.
Өкінішке қарай, көптеген Алаш қайраткерлері қуғын-сүргінге ұшырады. Алайда олардың еңбегі мен идеясы халық жадында мәңгі сақталды. Бүгінде тәуелсіз Қазақстанда Алаш зиялыларының мұрасы ерекше құрметтеледі.
Қорытындылай келе, Алаш зиялылары — ұлт болашағы үшін жанын қиған тарихи тұлғалар.
Олардың арманы — тәуелсіз, білімді және біртұтас қазақ елі еді. Бүгінгі ұрпақ сол аманатқа адал болуы тиіс.
КЕРИМХАН Аружан,
Алматы қаласы Білім басқармасының
«№198 мектеп-гимназиясының»
11- сынып білім алушысы.
Республикалық «Farabi shakirti» журналы
мен www.farabishakirti.kz желілік басылым
сайтының Жас тілшісі