📸 Сурет: ЖИ көмегімен жасалынды (Жасанды интеллект).
Жолдаған: автор Менгельс Арай
Біз өмір сүріп жатқан Жер ғаламшары әлі де ашылмаған құпияларға толы. Табиғатта сыртқы келбетімен де, ерекше қабілеттерімен де таңғалдыратын тіршілік иелері аз емес. Олардың кейбірі ертегі кейіпкерлеріне ұқсаса, енді бірі ғылыми фантастикадан алынғандай әсер қалдырады. Алайда бұлардың барлығы – шынайы табиғаттың жаратылыстары.
Аксолотль – табиғаттың ерекше жаратылысы. Аксолотль – жолбарысты амбистоманың дернәсілдік сатысына ұқсас, жыныстық жетілу кезінде де дернәсіл белгілерін сақтайтын қосмекенді. Мексика суларын мекендейтін бұл жануар өзінің өзгеше келбетімен танымал. Оның ең таңғаларлық қасиеті – зақымданған аяқ-қолын, құйрығын және кейбір мүшелерінің тіндерін қайта қалпына келтіре алуы. Бұл тіршілік иесі биологиялық зерттеулерде жиі қолданылатын маңызды зерттеу нысандарының бірі.
Мәңгі жас қалпына орала алатын медуза.Теңіз әлеміндегі Turritopsis dohrnii медузасы ғылымды таңғалдырған тіршілік иелерінің бірі. Ол әлемнің қоңыржай және тропикалық суларында кездеседі. Оның басты ерекшелігі – жыныстық жетілу кезеңінен кейін қайтадан бастапқы полип сатысына орала алуы. Бұл үдеріс жасушалардың бір түрден екінші түрге өзгеруімен байланысты. Осы ерекшелігіне байланысты оны «өлмейтін медуза» деп атайды.
Тардиград – көзге көрінбейтін кішкентай алып.
Тардиград – микроскопиялық омыртқасыз жануар. Ұзындығы көбіне бір миллиметрге де жетпейтін бұл тіршілік иесі ерекше төзімділігімен танымал. Ол қолайсыз ортада тіршілік әрекетін барынша бәсеңдетіп, сусыздық пен өте төмен температураға төтеп бере алады. Тіпті ғарыш жағдайында да белгілі бір уақыт тірі қалатыны тәжірибелер арқылы анықталған.
Қорытынды. Нәтижесінде, Жер бетінде адам сенгісіз қабілеттерге ие, ғылымды таңғалдыратын тіршілік иелері өте көп. Олардың әрқайсысы табиғаттың күрделілігі мен алуан түрлілігін көрсетеді. Осындай ерекше жаратылыстарды зерттеу арқылы біз қоршаған әлемді тереңірек танып, жаңа ғылыми жаңалықтарға жол ашамыз.
МЕНГЕЛЬС Арай,
«Талғат Бигелдинов атындағы ЖББМ» КММ
11 – сынып оқушысы.
Бұхар Жырау ауданы, Қарағанды облысы