Сурет: ЖИ, жолдаған автор
Адам өмірінде туған жердің орны ерекше. Әр адамның жүрегінде өз ауылының иісі, табиғаты, адамдары мен балалық шағы мәңгі сақталады. Сондықтан да халқымыз «Туған жердей жер болмас, туған елдей ел болмас» деп бекер айтпаған. Ауыл – адамды еңбекке баулитын, адамгершілікке тәрбиелейтін, ұлттық құндылықтарды бойға сіңіретін қасиетті мекен. Сол себепті мен үшін ауыл – алтын бесік.
Ауыл – тыныштық пен тазалықтың, береке мен бірліктің ордасы. Таңертеңгі құстардың сайраған үні, самал желмен тербелген жасыл алқап, малдың өріске шыққан көрінісі – мұның бәрі ауылдың ерекше табиғатын көрсетеді. Қаланың қарбалас тіршілігінен шаршаған адам үшін ауыл – жанға тыныштық сыйлайтын мекен. Ауылдың ауасы таза, табиғаты көркем, адамдары ақкөңіл әрі қонақжай болып келеді.
Менің ауылым – менің мақтанышым. Онда менің балалық шағым өтті. Достарыммен асыр салып ойнаған сәттерім, атам мен әжемнің тәрбиесін тыңдап өскен кездерім мен үшін ең қымбат естеліктердің бірі. Ауыл адамдары бір-біріне әрқашан көмектесіп, қиындықта бірге болады. Осындай ауызбіршілік пен сыйластық ауылдың басты байлығы деп ойлаймын.
Қазақ халқының салт-дәстүрі мен ұлттық тәрбиесі де көбіне ауылда сақталған. Үлкенді құрметтеу, кішіге қамқор болу, қонақ күту, дастарқан жаю сияқты қасиеттер ауыл өмірінде ерекше көрінеді. Ауыл – ұлттық рухтың алтын қазығы. Сондықтан ауылды дамыту – ел болашағын дамыту деген сөз.
Бүгінде ауылдардың дамуына мемлекет тарапынан көп көңіл бөлінуде. Жаңа мектептер салынып, жолдар жөнделіп, жастарға мүмкіндік жасалып жатыр. Бұл – ауылдың болашағына деген сенімнің белгісі. Болашақта ауылдарымыз гүлденіп, жастар туған жерін дамытуға үлес қосады деп сенемін.
Қорытындылай келе, ауыл – әр адам үшін ыстық мекен. Ол – біздің тамырымыз, тарихымыз, тәрбиеміз. Туған ауылын сүйген адам өз елін де құрметтейді. Сондықтан әрқашан ауылымызды қадірлеп, оның көркеюіне үлес қосуымыз керек. Мен үшін ауыл – алтын бесік, өмірімнің ең қымбат мекені.
УЛЖАБАЕВА Алмагуль,
Алматы облысы, Жамбыл ауданы,
«Қарғалы №3 орта мектебінің» 11«А» сынып оқушысы
Шығармашылық жетекшісі: Жақыпбек Елдар Еркінұлы,
Қазақ тілі мен әдебиеті пәндерінің мұғалімі,
директордың тәрбие ісі жөніндегі орынбасары